Përfaqësuesi i Odës së Farmacistëve të Kosovës, Astrit Haxhijaha, ka shprehur mbështetjen për ligjin e unifikimit të çmimeve të barnave, por ka kritikuar mënyrën e prezantimit të uljeve të çmimeve nga Ministria e Shëndetësisë (MSH).

“Në parim, ne e përkrahim implementimin e këtij ligji, pasi do të ndikojë drejtpërdrejt në uljen e çmimeve. Megjithatë, nuk presim ulje drastike siç i ka prezantuar MSH-ja”, ka deklaruar Haxhijaha, duke shtuar se këto ulje bazohen në një listë të parë prej 100 produkteve të fryra, duke marrë për bazë nenin 8 të ligjit që referon çmimet në shtete të tjera.

Ai përmendi rastin e kremit Travazol, i cili thuhet se do të bëhet 10.6 herë më i lirë, si shembull të uljeve që, sipas tij, nuk përfaqësojnë realitetin e tregut.

“Këta janë bazuar me listën e parë me 100 produkte të cilat janë dalë të fryra, duke u bazuar tek neni 8 në të cilat janë marrë shtetet referente. Këto të cilat i ka prezantuar ministri i Shëndetësisë, i ka marrë të listës së parë”, ka deklaruar ai.